សឹង្ហបុរី៖ ស្ថានទូតព្រះរាជាណាចក្រកម្ពុជាប្រចាំសាធារណរដ្ឋសិង្ហបុរី ថាចាប់ពីពេលនេះតទៅប្រទេសសិង្ហបុរីបានបញ្ឈប់លក្ខខណ្ឌធ្វើតេស្តរកជំងឺកូវីដ-១៩ ទាំងតេស្ត PCR និងតេស្តរហ័ស លើអ្នកដំណើរទាំងអស់ដែលបានចាក់វ៉ាក់សាំងពេញលេញ។

ក្នុងសេចក្ដីជូនដំណឹងរបស់ស្ថានទូតកម្ពុជាប្រចាំប្រទេសសិង្ហបុរីឲ្យដឹងថា ចាប់ពីថ្ងៃទី២៦ ខែមេសា ឆ្នាំ២០២២នេះ អ្នកដំណើរទាំងអស់ដែលបាន ចាក់វ៉ាក់សាំងពេញលេញ រួមទាំងកុមារអាយុ ១២ឆ្នាំ និងក្រោម ១២ឆ្នាំ លែងតម្រូវឲ្យធ្វើតេស្ត PCR ឬ ART មុនចេញដំណើរចូលសិង្ហបុរី ដូចមុនទៀតហើយ។

អ្នកដំណើរមកពីកម្ពុជាអាចធ្វើដំណើរចូលតាមជើងយន្តហោះណាមួយក៏បាន។

បើទោះជាយ៉ាងណាកស្ថានទូតកម្ពុជាបញ្ជាក់ថា ការពាក់ម៉ាស់នៅតែជាកាតព្វកិច្ចនៅក្នុងអគារបិទជិត (Indoor) រួមទាំងមធ្យោបាយដឹកជញ្ជូនសាធារណៈ ខណៈនៅទីសារធារណៈខាងក្រៅអគារ (Outdoor) អាចពាក់ក៏បាន ឬមិនពាក់ក៏បាន (Optional) និងលើកទឹកចិត្តឲ្យពាក់ ម៉ាសំនៅពេលមានមនុស្សច្រើនកុះករនៅពេលដែលអ្នកដំណើរចូលដល់ប្រទេសសឹង្ហបុរី៕